Kaixo!!!
Gabonak iristear dira eta zuen etxeetan kozinatzeko errezeta berezi batzuen ideiak nahi?
Hemen duzue ebooka deskargatzeko aukera!
Mila esker!
Ariketa fisikoa egiten duzunean kontuan hartzen al duzu jaten duzuna? Zure ustez zerikusia izan dezake jaten duzunak zure errendimenduan? Edo egoera fisikoa da %100ean eragiten duena?
Ebidentzia zientifikoek eta hainbat ikerketek baieztatu dute, elikadurak egiten dugun horren errendimenduan zerikusi zuzena izan dezakeela eta probatu dutenek ondo dakite hori.
Hori dela eta, ariketa fisikoa egiten dugunerako gomendioak ematen saiatuko gara eta uztailak 9an ospatuko den “Ekana klasikoa” bizikleta ibilaldia, hauek probatzeko aukera paregabea iruditu zaigu! Animatzen zara?
Ariketa fisikoa egiten dugunean, askotan praktikatzen dugun momentua soilik hartzen dugu kontuan eta ahaztu egiten zaigu aurretik eta ostean ere gure gorputzak funtzionatzen jarraitzen duela eta beharrizan konkretu batzuk dituela. Beraz aurreko lan bat suposatzen du gure elikadura zaintzeak.
Esaterako ariketa egingo dugun egunera energia gordailu beteekin iristeko, aurreko egunetan karbohidrato karga bat egitea da gomendagarria. Nahiz eta duela urte batzuk, astebete lehenago kargarekin hasi behar genuela esan, gaur egun ikusi da ez dela beharrezkoa eta hiru egun lehenago hasita nahikoa izango litzatekeela. Gainera askotan probaren arabera egun bat lehenago hastearekin ere nahikoa da.
Baina zer jan dezaket momentu horretan?
Egia da, pertsona bakoitzak bere beharrizanak dituela baina orokorrean pertsona bakoitzaren kg-ko (bere pisua), 7-12g karbohidrato hartzea gomendatuko litzateke. Eta praktikan zenbat da hori? Esaterako 70kg-ko pertsona batean, 490g – 700g karbohidrato artean hartzea izango litzateke.
Adibidez ondorengoa janda= 696g karbohidrato hartuko genituzke
Beraz elikadura plan honekin, glukogeno gordailu beteekin iritsiko ginateke proba egunera. Zuntzaren kontsumoa gutxitzea gomendatzen da (barazkiak, zereal integralak… ) ohituta ez gauden kasuetan, eragozpenik ez izateko digestio arloan. Hidratazioa ere kontuan hartuko dugu eta aurreko egunetan ur asko edaten ahaleginduko gara.
Baina egunean bertan zer gomendatzen da?
Proba 8:15etan hasiko denez, aurreko otordua, 2-3 ordu lehenago egitea gomendatzen da digestio arazoak ekiditeko. Egia da ez dela oso erosoa izaten hain goiz esnatzea baina bakoitzaren erritmora egokituta ordu egoki bat aurkitu beharko da deserosotasunak saihesteko. Momentu honetan, 2-4g karbohidrato kontsumituko genituzke, 70kg-ko pertsona batean 140g-280g.
Beraz gosaltzeko, ondorengo planarekin= 145g karbohidrato hartuko genituzke.
Beraz gosaldu osteko eta proba hasi arteko denboran, hidratazioa zaintzea gomendatuko litzateke, ura edo isotonikoa izan daitezke aproposak honetarako.
Hau guztia egin ostean, ibilaldiari ekiteko ordua da, baina hartzen al duzue kontuan jaten duzuena bizikleta gainean zaudetenean? Edo gorputzaren sentsazioen arabera moldatzen zarete? Zer da gomendagarria?
Hidratazio aldetik, jende askori asko kostatzen zaion arren, orduko gutxienez 500ml ur hartzea gomendatzen da. Isotonikoak urarekin batera erabiltzea, aukera egokia izan daitezke hidratatzeaz gain, karbohidratoak eta sodioa dauzkatelako. Eta elikagaiei dagokienez, gantz gutxi, proteina gutxi eta karbohidrato kopuru handia dutenak aukeratuko ditugu. Gomendagarriena orduko 30-90g karbohidrato (mota desberdinetakoak konbinatuz) hartzea litzateke, baina bakoitzaren egoerara moldatzea izango denez interesgarriena eta digestio aparatua entrenatzen lortuko genukeenez kopuru hau hartzea, hemen bizikleta gainean hartzeko hainbat elikagai adibide: Datilak, mertxika lehorrak, pasak, menbriloa, platanoa, barritak, gelak, gominolak, edateko zaporezko jogurtak…
Azkenik sodioa hartzea ere interesgarria da, ariketa egiten ari garen bitartean, izerdi bidez ura galtzeaz gainera gatzak galtzen ditugulako. Gomendioa, gutxi gorabehera, 500-1500mg Na hartzea litzateke. Eta hau, gatz pastila bidez, edari isotoniko bidez edo elikagai konbinazio egoki batekin lortu genezake.
Azkenik, askotan ahazten zaigun eta errekuperazio optimo baterako beharrezkoa den fasea dator. Ariketa fisikoa egin osteko momentua. Ondo errekuperatzeko, energia gordailuak berriz bete eta muskuluen berreskurapen egoki baterako, karbohidrato eta proteina konbinazioa 3:1 edo 4:1ekoa duten elikagaiak edo suplementoak hartzea da interesgarriena. Esaterako, adibide orokor batzuk hauek izan daitezke: Gazta freskoa platanoarekin, ogia gazta fresko eta almendrekin, esne eta marrubi irabiakia, eta suplemento gisa 3:1, 4:1 proportzioa errespetatzen duen irabiakia esaterako.
Beraz badago ezer hoberik ariketa fisikoa egiten dugun bitartean honetaz disfrutatzea baino? Eta elikadurak honetan laguntzen badu, zergatik ez ditugu bere onurak aprobetxatuko?
Hemen dituzue jardueraren xehetasunak: https://ekana.es/i-ekana-klasikoa/
Disfrutatu!!
Ezagutzen duzue Harvard plateraren teknika?
Plater hau, Harvardko Osasun Publikoko Eskolako adituek sortutako platera da gure otordu nagusiak modu osasungarri eta orekatuan antolatzeko.
Baina zer esan nahi du? Nola dago banatuta?
Gomendatzen dena alde batetik, gure plateraren erdia barazki eta frutaz osatuta egotea da. Geroz eta barietate handiagoa hobeto. Hau da, barazkiak entsalada gisa (gordinik), kreman, labean, lurrunduta, salteatuta… edo mila modutara prestatuta izan daitezke.
Plateraren laurdena berriz, zereal integralez edo osoko zerealez osatuta egon beharko da. Hau da, karbohidratotetan aberatsak diren elikagaiez batez ere. Hemen, arroz integrala, pasta integrala, gari integralez egindako ogia, artatxikia, kinoa, artobeltza… sartuko lirateke. Bestalde, nahiz eta zerealen taldekoak ez izan, patata eta batata esaterako karbohidratotan aberatsak direnez, talde honetan sartuko genituzke.
Azkenik gelditzen den laurdena, proteina osasungarriekin osatuko genuke. Hauek, arrautza, arraina, haragia eta lekaleen taldeko elikagaiak dira.
Eta horrela ikusita erraza iruditzen zaizue mota honetako platerak osatzea?
Seguru, lehenengoz ikusi baduzue, benetan dena baino konplikatuagoa irudituko zitzaizuela. Baina baietz askotan konbinazio hauek egin konturatu gabe? Nork jan du arrautza eta patata egosiz eta barazkiz osatutako entsalada bat? Edo arraina labean patata eta barazkitxoekin? Edo garbantzo entsalada bat ogiarekin lagunduta?
Gustatu zaizue Harvard platera osatzeko gaur eman dizuegun konbinazio ideia?
Zenbat ur edan behar dut egunean?
Zenbat aldiz entzun duzue egunean 2 litro ur edatea beharrezkoa dela? Edo zuotariko zenbatek pentsatzen duzue 8 edalontzi ur edatea beharrezkoa dela osasuntsu mantentzeko?
Seguru batek baino gehiagok egiazko baieztapenak direla pentsatuko duzuela, hainbat lekutan irakurri edo entzun dituzuelako, baina benetan horrela da?
Egia esan ez da horrela. Izan ere, beharrizanak elikaduran bezala hidratazioan, oso aldakorrak eta indibidualak dira. Norberak bere egoeraren, gorputz konposaketaren, bizi den lekuaren… arabera gehiago edo gutxiago edan beharko du. Hau da, ez da berdina izango herrialde bero baten bizi den, kirolari profesional batek edan beharko duen ur kopurua edo hotza egiten duen leku batean bizi den pertsona sedentario batek edan beharko duena. Hori dela eta, ezin da gomendioa 2 litroetara laburbildu eta horrelako aholku orokor bat eman. Gainera, elikadura patroi egoki bat jarraituta, fruta eta barazkien eguneko kontsumoa egokia bada, hauen konposaketaren parte oso haundi bat ura dela kontuan hartuta, zeharka hidratatzen ariko ginake. Hidratazioa, garrantzitsua izango da hainbat gauzen artean, egunean zehar gernu, izerdi, gorotz eta arnasketa bidez galtzen dugun likido kopurua berreskuratzeko.
Gure gorputzak, egarri sentsazioaren bidez jakin dezake ura behar duen edo hidratatu dagoen, betiere pertsona osasuntsu bati buruz hitz egiten bagabiltza eta egarriarekin lotutako patologiarik ez badauka.
Eta ura edatea kostatzen bazaizu?
Badago jende asko agian ura edatea kostatzen zaiona, zapore faltagatik, gogo faltagatik edo kontsumitzean plazerrik nabaritzen ez dutelako. Horientzako trikimailu interesgarri bat zaporea gehitzea izan daiteke. Hau da, fruta gehituta (limoia, laranja, marrubia, masustak…) edo belarrak (menda, mendafina) zapore erakargarriagoa izatea lortuko genuke. Edari hotzak edatea kostatzen zaienentzat beste aukera bat, infusioak edo barazki saldak hartzea litzateke, behintzat hidratatzen ari diren bitartean disfrutatzen ariko direlako eta beti diogun bezala elikadura biziraute hutsa baino askoz gehiago delako.
#SELFCARE
Eta gehien miresten duzun pertsonari begiratzen diozun moduan begiratuko bazenio zure buruari?
Hartzen duzu denbora zoriontsu egiten zaituen hori egiteko?
Gaur azken aldian sarritan erabili dugun #selfcare hitzari buruz hitz egitera animatu gara. Garrantzi handiko kontua dela uste dugu, askotan ingurukoen ongizateak bakarrik arduratzen gaituelako eta alde batera uzten dugulako gure burua, gainera maiz berekoikeriatan gabiltzala pentsatuz…
Gure burua mimatzea, maitatzea eta baloratzeari buruz ari gara #selfcare hitzarekin. Benetan baloratuko bagenu barruan daukagun altxorra eta konturatuko bagina gu geu garela gure bizitzako bidaian izango dugun pertsonarik fidelena…
Eta honekin ez dugu esan nahi norberak nahi duen guztia edo okurritzen zaion guztia egin behar duenik edo egin beharko lukeenik… Kontu txikiez ari gara, eguneroko kontuez.. Dutxa bero bat hartzeko denboraz, terraza bateko kafe goxoaz, ariketa fisikoa egiteko ordu erdiaz edo entsalada eder bat prestatzeko denboraz…
Badakizue zertan laguntzen duten ekintza txiki hauek? Produktibitatea handitzen dute, autoestimua hobetzen laguntzen dute, autoezagutzarako ere balio dute, zure buruari gehiago emanda ingurukoei ere gehiago eskaintzeko gaitasunak garatzen dituzu, eguneroko kontuak modu positiboagoan ikusten laguntzen dute…
Ta zu, zerk egiten zaitu zoriontsu?
Uda giroan murgilduta gaude iada. Nahiz eta aurtengoa zertxobait arraroa izan eta plan batzuk egiteko aukera txikiagoa eduki, sarritan jarraitzen dugu etxetik kanporako otorduak egiten. Baina askotan ez dakigu zer hartu aukeraketa egoki bat egitea baldin bada gure helburua.
Hori dela eta guk ideia zerrenda bat proposatuko dizuegu zuen hautua egiteko erraztasunak izan ditzazuen.
Egia da, gure inguruko hainbat tabernetan ez dela oso erraza aukeraketa egokiak egitea aspertu gabe. Eskuragarritasuna edo aukeratzeko dugun produktuen zerrenda oso txikia izaten da eta jende asko tabernatik tabernara joatera ohituta dagoenez, lau dira eskatu daitezkeen edari osasungarriak.
Baina taberna batera zerbait hartzera goazenean, edari bat aukeratzeko trikimailu hau erabili dezakegu: AZUKRERIK EZ eta ALKOHOLIK EZ. Horrela, nahiz eta aukerak asko murriztuko diren, gure gorputzarentzat kaltegarriak izango diren produktu bi alde batera uzten egongo ginake.
Baina orduan zer kontsumitu dezaket?
Adibidez, aukera egokiak izan daitezke honako hauek:
Eta ze pintxo dira “onenak” ?
Hemen ere, pintxo “okerrenak” alde batera uzteko eta “onenekin” gelditzeko trikimailua erabili dezakegu. Esaterako, hiru puntu hauek kontuan hartzea: FRIJITURIK EZ izatea, SALTSARIK EZ izatea eta ahalik eta OGI GUTXIEN izatea. Hortaz hoberenak:
Eta ogitartekoa aukeratzen badugu zein izango da hoberena?
Ogitartekoa aukeratzerako orduan ere, goiko puntu berdinak jarraitzen dituen trikimailua erabili dezakegu.Esaterako:
Hemen adibidez trikimailu on bat, ogiaren erdia ez jatea izango da eta tosta izango balitz moduan jatea. Askotan aurrean dugulako jaten dugu ogi kopuru hori eta ez benetan gose garelako eta erdiarekin soilik probatu dezakegu eta ikusten badugu asetu garela beste erdia platerean uztea izango da hautu egoki bat.
Lehen aipatu bezala, hau guztia helburuaren araberakoa izango da. Kontuan hartuko dugu zenbat aldiz joaten garen esaterako astean tabernara. Oso gutxitan joaten bagara eta egun konkretu bateko kontua bada, gehien gustatzen zaizuena hartzea gomendatuko genizueke, beti esaten dugun moduan egun konkretuetan egiten denak ez duelako gure osasunean horrenbeste eragiten eta batzuetan elikagai ez hain osasungarriak jaten disfrutatzea izan daiteke markatutako helburua.
Zenbat aldiz ikusi dituzue horrelako konparaketak sare sozialetan?
Eta zenbat aldiz pentsatu izan duzue zuen gorputzetan aldaketarik egon ez bada ez duzuela ondo egin?
Guztiz normala da horrelako sentimendu edo pentsamenduak izatea, leku guztietan erakusten baitigute gorputz konposaketa hobetzen bada dena ondo egin duzunaren seinale dela, baina ez dauka zertan horrela izan!
Gu pixka bat kezkatzen gaituen zerbait denez, gaur zuekin partekatzea erabaki dugu. Askotan, soilik itxura fisikoan zentratzen gara eboluzio edo aldaketa baten emaitzak neurtzeko eta alde batera uzten ditugu askoz garrantzitsuagoak diren hainbat faktore. Argazkiko bi gorputzen artean, aldaketa fisikorik nabaritzen al duzue? Eta elikadura ohiturak aldatu dituela uste duzue?
Ba bai. Kasu honetan, aldaketa fisikorik egon ez arren, bere ohiturak asko hobetu ditu, oso ondo egiten ari da, nahiz eta gora beherak izan eta egun batzuetan besteetan baino gehiago kostatu normala den moduan. Gutxinaka gutxinaka ari da bizi estilo osasungarri batean murgiltzen, helburu txikiak jarriz eta ahal duen bezain hoberen betetzen, jakina berak nahi duena delako eta ez gizarteak inposatutako zerbait.
Eta zer lortu du?
Orain hobeto sentitzen da bere buruarekin, sabelaldeko ondoeza asko arindu zaio, pozik dago orain lehen baino fruta gehiago jaten duelako, asko hobetu du elikagaiekin duen harremana orain estresatuta dagoenetan ez baitu hozkailura jotzen, baina ez du bere gorputzaren taila txikitu.
Eta zer?
Nola kudeatuko dut elikadura berrogeialdian?
Askok buruan izango duzuen kezken artean, elikadura kudeatzearena egongo da seguraski. Normalean askori etxera iristen garen momentu hori egiten bait zaigu zailena elikagai ez hain osasuntsuak jateari dagokionean. Eta orain 24 orduz etxean egon behar?
Egoera hori ahalik eta modu hoberenean igarotzeko, hainbat aholku emango dizkizuegu jarraian.
Norberaren helburuak zehaztea izango litzateke lehenengo pausua. Hau da, nire etxeko egonaldia nolakoa izatea nahi dudan aurreikusi eta baliabideak jarri halakoa izan dadin. Elikadurari arreta jarrita, garrantzitsua izango da lehenik eta behin etxean dudanetik abiatzea aprobetxamendu handiena emateko janariari. Eta hori jakinda, asteko otordu planifikatzaile bat hartu eta bertan otordu bakoitzean jango dudana eta bakoitzaren ordutegia jarri ditzaket.
*Behean duzue erabili dezakezuen planifikatzaile txantiloi huts bat.
Hori horrela, erosketa zerrenda egitera abiatu naiteke. Planifikatu dudan honetatik, zer falta zait errezeta hauek prestatu ahal izateko? Erosketak egitera goazen bakoitzerako, nahiz eta berrogeialdia ez izan, erabilgarria izango da erosketen zerrenda eginda eramatea. Horrela, beharrezko ditudan gauzak bakarrik erosteko probabilitatea handiagoa izango da zerrendarik egiten ez badut baino, nahiz eta askotan zerrendatik at dagoen zerbait erosi.
Eta behin otorduen planifikazioa eta erosketak eginda ditudala, kozinatzeko txandak planifikatzearen ordua izango da. Hemen kontuan hartu beharko genituzke espero ditugun egunak. Izan ere, egun guztia etxean egoteak, ez du esan nahi munduko denbora libre guztia dugunik, beraz honi ere tartetxo bat ateratzea eta gure lehentasunen barnean jartzea garrantzitsua izango da.
Azkenik, gure helburuak zehazteko orduan, hainbat puntu izan beharko genituzke kontuan. Alde batetik, errealak izatea bermatu beharko dugu. Esaterako ez ditugu errezeta zailak eta luzeak direnak jarriko kozinatzea gorroto badugu. Gustukoak izateak ere, berebiziko garrantzia izango du, orburuak gustatzen ez bazaizkit, nahiz eta oso osasungarriak izan, ez ditudalako disfrutatuko eta horrek planarekiko dugun adherentzia murriztuko duelako. Bestalde, errezeta berriak probatzeko momentu on bat izan daiteke. Baina denak egun berdinean ez egitea gomendatuko genizueke. Noizean behin egitea denboran iraunkorragoa izango da eta horrela “normaltasuna” hasten denean eguneroko ohituretan txertatzeko errezeta gehiago izan ditzakezue. Azkenik, garrantzitsua den beste puntu bat, “bizioei” gure planifikazioan tartetxo bat egitea izango da. Errealistak bagara, eta egoera berezi batean gaudela kontuan hartuta, armairuan tentazioa eragiten digun elikagai konkretu bat badugu, gure burua hura ez jatera derrigortuta antsietatea areagotzen ibiliko gara. Eta kontzienteki jateko baimena emateak aldiz, lasaitasuna eragingo du gure barrenean eta antsietate maila hobeto kudeatzen lagunduko digu.
Kontuan hartu behar baitugu elikatzea ez dela zuria edo beltza den kontu bat, mila faktorek baldintzatzen duten zerbait da eta egunero egiten duguna da kontuan hartu beharko genukeena eta ez aldiz, egun konkretu batean egin edo jan dezakeguna.
on ekin nutrizioa
Hasi da atzerakontua! Oporrak gero eta gertuago ditugu eta gutariko asko azken orduko planak prestatzen gabiltza. Non igaroko dituzue atseden egun hauek? Hondartzan, mendian, hiriren bat bisitatuko duzue edo zuen herrian geldituko zarete?
Eta elikadura aldetik, nola espero dituzue? Oporrak disfrutatzeko dira jakina, baina modu asko daude disfrutatzeko eta horietako bat osasuntsu jaten disfrutatzea da malguak izaten jakinda jakina!
Gaurko honetan, udan elikadurarekin ahalik eta harreman egokiena izateko erramintak ematen saiatuko gara. Lehenik eta behin, beti aipatzen dizuegun bezala norberak bere helburua zehaztu beharko du eta helburu horrek osasuntsu jatea hartzen badu beregain hau da egin dezakezuena: Hemen dituzue proposamentxo batzuk.
Etxean beti errazagoa da ondo jatea, gomendagarriena produktu desegokiak bertan ez izatea eta fruta, fruitu lehorrak… eskuragarri izatea da. Baina zer egin dezakegu etxetik kanpo planak egiten ditugunean?
Esaterako beti aukera egokia izango da goazen lekura goazela frutaren bat eramatea. Gosez bagaude, asetasuna eragingo digu, egarria badugu, hau arintzen lagunduko digu eta horrez gain, gure gorputza nutriente egokiz hornitzen ibiliko gara. Batzuetan nagikeriagatik fruta jatea kostatzen bazaigu, erosten dugun egunean, dena txikitu eta tupper batean gordetzea aukera egokia izaten da, jateko momentuan bertan atera eta gehiago egin beharrik ez izateko.
Beste alde batetik, fruitu lehorrak ere eraman ditzakegu. Oso errazak dira poltsan eramateko edo goazen lekura goazela garraiatzeko. Hauetan bai, kontuan izan beharko dugu osagaien zerrenda. Egokienak gordinak edo txigortuak izango dira, gatzik, azukrerik, eztirik eta tankerako produktu gehiturik gabeak. Hauetariko zein duzue gustokoen?
Bestalde, kalitatezko ogiarekin egindako tostak eramatea ere ondo dago. Gazta freskoarekin, tomate xerraren batekin, ahuakatearekin, fruitu lehorren kremaren batekin, arrautzarekin…
Txitxirio hummusa barazki makiltxoekin edo kalitatezko ogi makiltxoekin, etxean egindako bizkotxo edo gailetak, hozkailutxoa eraman ezkero txokolate beltza, jogurta naturalen bat…
Baina askotan jatekoa hobetzeaz gain edaritarako eramaten duguna ere hobetu dezakegu. Ohitura handia dugu azukredun edariak eramateko baina badaude aukera gehiago eta osasunarentzat askoz egokiagoak.
Esate baterako, ura beti hautu paregabea da baina zapore eta bizitasun handiagoa emateko, frutaren bat gehitu diezaiokezue, adibidez laranja xerrak, limoi birrindua, masustak…
Probatu dituzue inoiz infusio edo te hotzak? Azken finean berdinak dira baina izotza gehituta eta egun berotan askoz hobeto sartzen dira. Kafea ere eraman edo kontsumitu dezakegu baita gazpatxoa eta salmorejoa ere.
Beraz ikusten duzuen bezala nahi izan ezkero oporrean snack osasuntsuak egitea ez da hain zaila. Honek ez du esan nahi, egun konkretu batzuetan gure helburua bestelakoa izan daitekeenik eta egun horietan elikagai ez osasuntsuak jatea erabakitzen badugu modu berdinean disfrutatu dezakegunik. Horrek, elikadurarekin dugun harremana, sanoa eta egokia dela esan nahiko duelako.
Osasuntsu jatera goazenean garrantzia handia ematen diogu kalitatezko lehengaiak erosteari, izan ere, hori izango da gero gure gorputzera sartuko duguna; baina, sukaldatzeko erabiltzen ditugun materialei erreparatzen al diegu? Ez al dira elikagaiekin kontaktu zuzenean egongo? Zer gertatzen da itsaspenaren aurkako materialean pitzadurak dituzten zartagiak erabiltzean? Elikagaira partikulak pasa daitezke?
Egia da gaur egun merkatuan mota, tamaina, material eta prezio desberdinetako zartaginak aurkitu ditzakegula eta hori zartagiaren kalitatearekin guztiz lotuta egongo da. Baina zeri jarri behar diogu harreta berezia erosterako orduan? Material bakoitzak ezaugarri desberdinak ditu, horien artean produktuak arinagoak edota astunagoak bilakatuz erabiltzeko orduan. Baina benetan garrantzitsuena itsaspenaren aurka erabiltzen duten materialaren kalitatea izango da, izan ere horrek oztopatzen du elikagai eta materialaren arteko elkartrukea.
Honako baldintza hauek bete behar dituzte:
Guk esaterako, Lacor markako zartagiekin lan egiten dugu eta hauek Withford edota Ilag izen eta bermedun itsaspenaren aurkako materialekin lan egiten dute. Horrek zartagiaren eta elikagaiaren arteko elkarrekintzarik ez egotea bermatzen duelarik. Modu horretan elikagai osasuntsuekin kalitatezko platerak prestatzen ditugula ziurtatuz.
Nola zaindu zartagiak kalitatea mantentzeko?
Eta zuek, garrantzia ematen diozue zartagien kalitateari?
